கண்ணீருடன் விடைபெற்றார் சச்சின் ரமேஷ் டெண்டுல்கர்...!!!

வான்கடே ஸ்டேடியத்தில் சச்சின் திருவிழா...!!

தனது 200வது மற்றும் கடைசி டெஸ்டில் விளையாடும் சச்சின், சதம் விளாசுவாரா? என்ற எதிர்பார்ப்போடு ரசிகர்கள் ஆவலுடன் காத்திருந்தனர். தனது அனுபவ ஆட்டத்தை வெளிப்படுத்திய சச்சின் அரை சதத்தை பூர்த்தி செய்தபோது, வான்கடே ஸ்டேடியம் அதிர்ந்து அடங்கியது. மறு முனையில் புஜாராவும் அரை சதம் கடந்தார்.

சச்சினின் ஒவ்வொரு ஸ்ட்ரோக்குக்கும் ரசிகர்கள் எழுந்து நின்று கைதட்டி ஆர்ப்பரித்தது கண்கொள்ளா காட்சியாக இருந்தது. நிச்சயம் சதம் அடிப்பார் வென்ற நம்பிக்கையை ஏற்படுத்திய சச்சின், துரதிர்ஷ்டவசமாக 74 ரன் எடுத்த நிலையில் (118 பந்து, 12 பவுண்டரி) தியோநரைன் பந்தில் முதல் ஸ்லிப்பின் நின்றிருந்த சம்மி வசம் பிடிபட்டு ஆட்டமிழந்தார். இதை கொஞ்சமும் எதிர்பாராத ரசிகர்கள் அதிர்ச்சியில் உறைந்து போனார்கள்.
சச்சினும் ஏமாற்றம் அடைந்தாலும், வழக்கம்போல சில விநாடிகள் வான் நோக்கிய பின்னர் மட்டையை உயர்த்தி ஆட்டியபடி ரசிகர்களிடம் இருந்து விடை பெற்று பெவிலியன் திரும்பினார்.